Тошкент, Ўзбекистон (UzDaily.uz) — Ўзбекистонлик теннисчилар Полина Кудерметова ва Камилла Раҳимова Хитойнинг Нинбо шаҳрида хард қопламали кортларда ўтказилаётган WTA 500 тоифасидаги BNB Ningbo Open турнирининг асосий тўрига йўл олди. Ҳар икки спортчи саралаш босқичида иккитадан ғалабага эришди.
Саралашнинг биринчи босқичида Полина Кудерметова 11-рақам остида сараланган Таиланд вакили Мананчая Савангкаевани 6:3, 6:4 ҳисобида мағлуб этди. Саралашнинг ҳал қилувчи учрашувида эса ўзбекистонлик теннисчи Анастасия Захаровани 6:3, 6:3 ҳисобида енгди.
Камилла Раҳимова ҳам саралаш босқичидан муваффақиятли ўтди. У биринчи даврада украиналик теннисчи Даяна Ястремскаяни 6:2, 6:4 ҳисобида мағлуб этди. Саралашнинг ҳал қилувчи баҳсида Раҳимова россиялик Татьяна Прозорова билан учрашиб, уч сет натижасига кўра 7:6 (4), 4:6, 6:4 ҳисобида ғалаба қозонди.
Шу тариқа, Ўзбекистоннинг ҳар икки вакили Нинбода ўтаётган турнирнинг асосий тўридан жой олди. Раҳимова саралашнинг биринчи босқичида мағлуб этган Даяна Ястремская учун «Катта дубулға» турнирларидаги энг яхши натижа 2024 йилда Australian Open мусобақасининг ярим финалига чиқиш бўлган.
