Ўзбекистон U-23 Осиё чемпионатини икки кумуш билан бошлади

Тошкент, Ўзбекистон (UzDaily.uz) — Хитойнинг Ордос шаҳрида ўтаётган 23 ёшгача бўлган спортчилар ўртасидаги енгил атлетика бўйича Осиё чемпионатининг биринчи кунида Ўзбекистон терма жамоаси икки кумуш медални қўлга киритди.

Миллий терма жамоага илк медални болға улоқтириш баҳсларида иккинчи ўринни эгаллаган Айюбхон Фаёзов тақдим этди.

Мусобақа якунига кўра, спортчи 71,16 метр натижа қайд этди.

Ўзбекистон терма жамоаси учун иккинчи кумуш медални Иброҳим Маҳкамов қўлга киритди. Уч ҳатлаб сакраш баҳсларида у 16,34 метр натижа кўрсатиб, шоҳсупанинг иккинчи поғонасидан жой олди.

23 ёшгача бўлган енгил атлетикачилар ўртасидаги Осиё чемпионати Хитойнинг Ордос шаҳрида давом этмоқда. Мусобақанинг дастлабки кунининг ўзидаёқ Ўзбекистон вакиллари миллий терма жамоа медаллар жамғармасини икки кумуш медаль билан бойитди.