Ўзбекистон грек-рим кураши терма жамоаси U15 Осиё чемпионатида ғолиб бўлди

Тошкент, Ўзбекистон (UzDaily.uz) — Таиланднинг Паттайя шаҳрида 15 ёшгача ва 20 ёшгача бўлган спортчилар ўртасида спорт кураши бўйича Осиё чемпионати расман бошланди.

Қитъа биринчилигида медаллар учун курашни биринчи бўлиб кичик ёш тоифасидаги (U15) грек-рим кураши бўйича терма жамоалар вакиллари якунлади.

Мусобақадан сўнг, Ўзбекистон ёшлар терма жамоаси ажойиб натижа кўрсатиб, турли номдаги жами саккизта медални қўлга киритди ва умумий жамоавий ҳисобда ишончли тарзда биринчи ўринни эгаллади.

Ўзбекистон терма жамоаси ҳисобига учта олтин медаль ёзилди. Абубакр Қурбонов 38 килограммгача, Маҳмуджон Ахмедов 41 килограммгача ва Бобур Сайфуллоев 44 килограммгача бўлган вазн тоифаларида чемпионликни қўлга киритиб, шоҳсупанинг энг юқори поғонасига кўтарилди.

68 килограммгача бўлган вазн тоифасида иштирок этган Руслан Овезмуратов эса кескин ва муросасиз курашлар натижасида кумуш медалга сазовор бўлди. Шунингдек, яна тўрт нафар ўзбекистонлик полвон чемпионатнинг бронза медалларини қўлга киритди.

Паттайяда Мирислом Ғофуров 48 килограммгача, Абдулазиз Хотамов 52 килограммгача, Беҳруз Абдупаттоев 62 килограммгача ва Темур Уралов 85 килограммгача бўлган вазн тоифаларида учинчи ўринни эгаллади.

Таиланддаги мусобақа бошқа ёш ва кураш йўналишлари бўйича баҳслар билан давом этмоқда.