Киров вилояти ва Silkway CA товар етказиб бериш бўйича келишувга эришди

Тошкент, Ўзбекистон (UzDaily.uz) — Киров вилояти Осиё давлатларидан Ўзбекистон орқали мева, сабзавот, тўқимачилик маҳсулотлари, озиқ-овқат ва бошқа товарларни тўғридан-тўғри етказиб бериш соҳасида ҳамкорлик бўйича меморандум имзолади. Ушбу келишув «Иннопром. Марказий Осиё» форуми доирасида имзолангани ҳақида ҳудуд губернатори Александр Соколов маълум қилди.

Унинг сўзларига кўра, ҳозирги етказиб бериш тизими маҳсулотларни воситачилар занжири орқали ўтишини назарда тутади, бу эса нархнинг ошишига ва сифатнинг пасайишига олиб келмоқда. Янги ҳамкорлик формати логистика жараёнларини оптималлаштириш ва харажатларни қисқартиришга қаратилган.

Ҳужжат «АГАТ 43» киров компанияси директори Андрей Березин ва Silkway CA бош директори Данияр Тиесов томонидан имзоланган.

Маълум қилинишича, Silkway CA Осиё давлатлари ва Россия ўртасида темирйўл логистикаси ҳамда тез бузиладиган маҳсулотлар учун авиақатновлардан фойдаланган ҳолда транспорт коридорини шакллантириш бўйича йирик инфратузилма лойиҳасини амалга оширмоқда.

Киров вилояти ушбу лойиҳага интеграциялашишни режалаштирмоқда ва аллақачон Киров шаҳрида «Северная широта» номли тақсимот маркази қурилишини бошлаган. Ушбу объект 120 минг квадрат метргача майдонга эга замонавий логистик хаб бўлиб, йиллик ўтказувчанлик қуввати 500 минг тоннадан ортиқ юкни ташкил этиши кутилмоқда.

Марказ Россия ва Осиё давлатлари ўртасида Волгабўйи, Урал ва Марказий Россия ҳудудлари орқали янги логистик тугунни шакллантириши кутилмоқда. У Татаристон, Нижний Новгород, Самара, Пермь, Екатеринбург, Бoшқирдистон ва Москва регионини ҳам қамраб олади.

Губернатор таъкидлашича, лойиҳа қайта етказиб бериш занжирларини ҳам ривожлантиради. Жумладан, ёғоч ва унинг маҳсулотлари, ўғитлар, пластмасса ҳамда ҳудуд саноатининг бошқа маҳсулотлари экспорт ҳажми ошишига хизмат қилади.

Шунингдек, у Ўзбекистон йўналиши ҳудуднинг ташқи савдосида энг муҳим йўналишлардан бири эканини алоҳида қайд этди. Унинг сўзларига кўра, 2030 йилгача савдо ҳажмини 50 фоиздан ортиққа ошириш режалаштирилган бўлиб, бу ёғоч қайта ишлаш маҳсулотлари экспорти, станоксозлик, фармацевтика ва кимё саноатида ҳамкорликни кенгайтириш ҳисобига амалга оширилади.

Ҳозирги вақтда Киров вилояти Ўзбекистонга ёғоч ва унинг маҳсулотлари, алюминий, қора металлар, озиқ-овқат маҳсулотлари ва ўғитлар етказиб бермоқда.