Тошкент, Ўзбекистон (UzDaily.uz) — Ғояни маҳсулотга айлантириш, биринчи мижозларни топиш ва инвесторни қизиқтириш — стартап асосчиси олдида турган муҳим вазифалардан. 8 октябрь куни Андижон вилоятидаги AI Hub — Сунъий интеллект марказида ўтказилган «Ғоядан инвестициягача» амалий воркшопи ёшларга шу жараённи тушуниш ва ўз лойиҳалари устида ишлаш имконини берди.
“IT Park”нинг Андижон филиалида ташкил этган тадбир стартапга қизиқувчи ёшлар, лойиҳа муаллифлари ва илк босқичдаги стартап асосчиларига қаратилди. Дастур ғояни шакллантиришдан бошлаб, инвестор учун тақдимот тайёрлашгача бўлган босқичларни қамраб олди.
Дастлабки машғулотлар лойиҳанинг асосини аниқлашга бағишланди: қандай муаммо мавжуд, таклиф этилаётган ечим кимга керак ва унинг бозордаги имкониятлари қандай? Иштирокчилар Lean Startup ёндашуви ва Customer Development услуби билан танишди: Амалий топшириқлар қиймат таклифини шакллантириш, мижоз сегментини аниқлаш ва кам ресурс эвазига ғояни синаб кўриш имконини берадиган маҳсулотнинг дастлабки кўриниши — MVPни белгилашга қаратилди.
«Ҳозир иккита стартапим — ParkOS ва Ilimli MVP босқичида. Уларни сотувга олиб чиқиш мақсадида воркшопга келдим. Бу ерда Lean Startup ёндашувини ўргандим ва лойиҳаларимнинг бизнес-моделларини қайта кўриб чиқишга қарор қилдим. Олган билимларимни қўллашни кейинга қолдирмоқчи эмасман — бугуноқ иккала стартапимнинг бизнес-модели устида ишлашни бошлайман», — деди воркшоп иштирокчиси, 15 ёшли дастурчи Оятбек Абдуғаниев.
Инвестиция жалб қилишга бағишланган блокда венчур жамғармалари ва бизнес-фаришталарнинг ишлаш тамойиллари, шунингдек, инвесторлар стартапни баҳолашда эътибор берадиган мезонлар қамраб олинди. Булар — бозор ҳажми, жамоа тажрибаси, бизнес-модель, дастлабки натижалар ва молиявий кўрсаткичлар.
Амалий топшириқлар лойиҳа учун қанча маблағ зарурлиги, унинг нималарга сарфланиши ва қандай натижага олиб келиши ҳақида аниқ тасаввур шакллантиришга қаратилди.
«Аввал ҳам кичик стартапларни ишга тушириб кўрганман, аммо улар муваффақиятсизликка учраган. Шунинг учун бу воркшопга стартапни ривожлантириш ҳақида кўпроқ билим олиш мақсадида келдим. Ҳозир жамоамиз билан анъанавий лабораторияларни онлайн форматга ўтказишга қаратилган Smart Lab лойиҳаси устида ишлаяпмиз. Воркшопда олган билимларимни шу лойиҳамизда ва келгуси стартапларимда қўлламоқчиман», — деди воркшоп иштирокчиси, дастурчи ва Smart Lab жамоаси сардори Яҳёбек Ҳабибуллаев.
Воркшопнинг яна бир қисми Pitch Deck — инвестор учун тақдимот тайёрлашга бағишланди. Унда муаммо ва ечим, қиймат таклифи, маҳсулот, бозор, рақобатчилар, бизнес-модель, жамоа ҳамда инвестиция сўровини қисқа ва тушунарли ифодалашга эътибор қаратилди.
Якуний питч-сессияда стартап асосчилари ўз лойиҳаларини уч дақиқалик тақдимот ва икки дақиқалик савол-жавоб формати тақдим этди ва тавсиялар олди. Бу формат иштирокчиларга лойиҳасининг энг муҳим жиҳатларини ажратиб кўрсатиш ва эксперт тавсиялари асосида уни такомиллаштириш имконини берди.
Дастур доирасида истиқболли лойиҳаларни “IT Park”нинг Андижон филиалининг инкубация ва акселерация дастурлари, менторлик имкониятлари ҳамда инвестицияга тайёрлашнинг кейинги босқичларига йўналтириш кўзда тутилган.
