Тошкентда II чоракда бизнес кайфияти яхшиланди

Тошкент, Ўзбекистон (UzDaily.uz) — 2026 йилнинг иккинчи чорагида Тошкент шаҳри ва Тошкент вилоятида бизнес юритиш шароитлари яхшиланганини қайд этган тадбиркорлар улуши 53 фоизга етди. Бу бир йил аввалги кўрсаткичга нисбатан 3 фоиз пунктга кўп. 2025 йилнинг иккинчи чорагида мазкур кўрсаткич 50 фоизни ташкил этган. Бу ҳақда Ўзбекистон Республикаси Марказий банки тадбиркорлик фаоллиги бўйича ўтказилган сўровнома натижалари асосида хабар берди.

Сўров натижаларига кўра, буюртмалар ҳажми ошганини қайд этган респондентлар улуши 51 фоизни ташкил этди. 2025 йилнинг иккинчи чорагида бу кўрсаткич 47 фоиз бўлган. Ишлаб чиқариш ҳажми ошганини билдирган тадбиркорлар улуши 50 фоизга етди, бир йил аввал эса бу кўрсаткич 43 фоизни ташкил этган.

Қўшимча ишчи кучига бўлган талаб ошганини тадбиркорларнинг 43 фоизи қайд этган, бир йил аввал бу кўрсаткич 41 фоиз эди. Юк ташиш ҳажми ошганини билдирганлар улуши ҳам 43 фоизни ташкил этиб, 2025 йилдаги 42 фоизлик кўрсаткичдан юқори бўлган. Кредит ва қарзлар бўйича тўловлар ошганини респондентларнинг 37 фоизи билдирган, бир йил аввал бу кўрсаткич 36 фоиз эди.

Корхоналарда ишлаб чиқариш қувватларидан фойдаланиш даражаси ўтган йилнинг шу даврига нисбатан 18 фоиз пунктга ошган.

Келгуси чорак бўйича кутилмалар ҳам яхшиланган. Буюртмалар ҳажми ошишини тадбиркорларнинг 51 фоизи кутмоқда, 2025 йилда бу кўрсаткич 50 фоизни ташкил этган. Ишлаб чиқариш ҳажми ошишини 46 фоиз тадбиркор кутмоқда, бир йил аввал бу кўрсаткич 45 фоиз бўлган. Ишчи кучига бўлган талаб ошишини кутаётганлар улуши эса 45 фоизни ташкил этди, 2025 йилда мазкур кўрсаткич 44 фоиз эди.

Сўров натижаларига кўра, буюртмалар ҳажмининг асосий ўсиши қайта ишлаш саноати, қишлоқ хўжалиги ва қурилиш соҳаларида кутилмоқда.

Яқин уч йил давомида иқтисодиёт ва бизнес муҳити яхшиланишига ишонч билдирган тадбиркорлар улуши 82 фоизни ташкил этди. Бу 2025 йилнинг иккинчи чорагидаги 57 фоизлик кўрсаткичдан 25 фоиз пунктга юқори.