Тошкент, Ўзбекистон (UzDaily.uz) — Ўзбекистонда банк карталари блоклангани сабаблари ҳақида маълумот олиш имконини берувчи InfoCards ахборот тизими жорий этилди. Бу ҳақда Ўзбекистон Марказий банки хабар берди.
Тизим Марказий банк, тижорат банклари, тўлов ташкилотлари ва тўлов тизимлари операторлари томонидан жорий этилди. У орқали картани қайси ҳуқуқни муҳофаза қилувчи орган блоклагани, бу қачон содир бўлгани ва қандай сабабга кўра блокланганини тезкор аниқлаш мумкин.
Энди фуқаролар бундай маълумотни олиш учун алоҳида Марказий банкка мурожаат қилиши шарт эмас. Бунинг учун хизмат кўрсатувчи тижорат банкига мурожаат қилиш кифоя. Банк InfoCards тизимидан фойдаланган ҳолда зарур маълумотларни олади ва мижозга карта қайси орган томонидан ва қандай сабабга кўра блокланганини тушунтириб беради.
Марказий банкда таъкидланганидек, тизим фуқаролар мурожаатларини кўриб чиқишни соддалаштириш, ортиқча маъмурий тартиб-таомилларни қисқартириш, шунингдек, банк хизматларидан фойдаланиш жараёнида тезкорлик ва шаффофликни оширишга қаратилган.
