Тошкент, Ўзбекистон (UzDaily.uz) — Осиё тараққиёт банки (ОТБ) Марказий Осиё давлатлари ва Корея Республикасининг қўшма лойиҳаларини, жумладан йирик ташаббусларни қўшма молиялаштириш орқали қўллаб-қувватлашга тайёр. Бу ҳақда ОТБ хабар берди.
14 сентябрь куни Сеулда ОТБ президенти Масато Канда Корея Республикаси бош вазирининг ўринбосари, Молия ва иқтисодиёт вазири Ку Юн Чхол билан учрашди.
Музокараларнинг асосий мавзуларидан бири Кореянинг Марказий Осиё давлатлари билан критик муҳим минераллар, сунъий интеллект ва энергетика соҳаларидаги ҳамкорлигини кенгайтириш бўлди.
Масато Канда банк қўшма лойиҳаларни амалга оширишга кўмаклашишга, жумладан уларни қўшма молиялаштиришда иштирок этишга тайёрлигини билдирди.
Унинг сўзларига кўра, критик муҳим минераллар соҳасидаги ҳамкорлик аниқ инвестиция лойиҳаларига айланиши керак.
Томонлар, шунингдек, Сунъий интеллект соҳасида инновациялар ва ривожланиш марказини тезроқ ишга тушириш ҳамда унинг кейинги фаолиятини муҳокама қилди.
ОТБ марказ ташкил этилишини май ойида Самарқандда эълон қилган эди. Марказ Корея Республикаси ҳукумати кўмагида Сеулда фаолият юритади.
Марказ 2035 йилга қадар қарийб 3 миллион кишининг рақамли кўникмалар ва сунъий интеллект соҳасидаги билимларни эгаллашига кўмаклашишни режалаштирмоқда.
Музокараларнинг яна бир мавзуси Корея технологиялари ва тажрибасидан Марказий Осиёдаги ОТБ энергетика лойиҳаларида фойдаланиш бўлди.
Томонлар банк томонидан амалга оширилаётган минтақавий ташаббуслар доирасида тегишли ечимлардан кейинчалик фойдаланиш имкониятларини муҳокама қилди.
