Ўзбекистон банкларида депозитлар бир йилда 34%га ошди
Тошкент, Ўзбекистон (UzDaily.uz) — Ўзбекистон банк тизимидаги депозитлар 2026 йил 1 август ҳолатига кўра 482,7 трлн сўмга етди. Бу бир йил аввалги кўрсаткичга нисбатан 34 фоизга ёки 122 трлн сўмдан кўпроққа ошганини англатади. Бир йил аввал депозитлар ҳажми 360,4 трлн сўмни ташкил этган. Бу ҳақда Ўзбекистон Марказий банки хабар берди.
Депозитлар банк тизимининг асосий кўрсаткичлари орасида энг юқори ўсиш суръатига эга йўналиш бўлди. Шу билан бирга, омонатларнинг муддатлар бўйича таркиби ҳам ўзгарган.
Талаб қилиб олингунча бўлган депозитлар 106,8 трлн сўмдан 142 трлн сўмгача ошган. Бироқ уларнинг умумий депозитлар ҳажмидаги улуши бироз камайиб, 30 фоиздан 29 фоизга тушган.
Бир йилгача бўлган муддатга жойлаштирилган қисқа муддатли муддатли депозитлар 120,5 трлн сўмдан 175,7 трлн сўмгача кўпайган. Уларнинг улуши эса 33 фоиздан 36 фоизга ошган. Бир йилдан ортиқ муддатли депозитларнинг улуши, аксинча, 37 фоиздан 34 фоизга қисқарган. Шу билан бирга, уларнинг абсолют ҳажми 133 трлн сўмдан 164,9 трлн сўмгача ошган.
Худди шу даврда банк тизими активлари 19 фоизга ўсиб, 852,4 трлн сўмдан 1016,6 трлн сўмга етган.
Банкларнинг кредит қўйилмалари 12 фоизга ошган. Кредитлар ҳажми 576,2 трлн сўмдан 644,6 трлн сўмга кўпайган. Шу тариқа, бир йил давомида иқтисодиётга йўналтирилган кредитлар ҳажми қарийб 68,4 трлн сўмга ошган.
Банк тизимининг жами капитали 150,6 трлн сўмни ташкил этган. Бир йил аввал бу кўрсаткич 127 трлн сўм бўлган. Шу тариқа, банкларнинг умумий капитали 19 фоизга ўсган.
Марказий банк маълумотларига кўра, депозитлар ўсиш суръатининг кредитлаш ҳажми ўсишидан юқори бўлиши банкларнинг ички ресурслар базасини кенгайтирмоқда.
