Ўзбекистон Жаҳон банки билан кафолат воситаларини кенгайтиришни муҳокама қилди

Тошкент, Ўзбекистон (UzDaily.uz) — Жорий йилнинг 28 ноябрь куни Иқтисодиёт ва молия вазири ўринбосари Илҳомжон Умрзаков Жаҳон банки, Халқаро молия корпорацияси ҳамда Кўп томонлама инвестицияларни кафолатлаш агентлиги вакиллари билан учрашди.

Кўп томонлама инвестицияларни кафолатлаш агентлиги (Multilateral Investment Guarantee Agency — MIGA) — Жаҳон банки гуруҳининг аъзоси бўлиб, ривожланаётган мамлакатларга тўғридан-тўғри хорижий инвестицияларни жалб қилишни қўллаб-қувватлашни таъминлайди. Агентлик хусусий инвесторлар ва кредиторлар учун хавфларни суғурталаш ва кредитни мустаҳкамлаш воситаларини тақдим этади, шу билан йирик инвестиция лойиҳаларини амалга ошириш ва мамлакатларнинг иқтисодий салоҳиятини ривожлантиришга кўмаклашади.

Учрашувда Жаҳон банкининг Марказий Осиё бўйича минтақавий директори Нажи Бенхассин, MIGA делегацияси таркибида Европа бўйича минтақавий раҳбар Олга Счковская, Марказий Осиё бўйича минтақавий раҳбар Жаэёунг Жин, Халқаро молия корпорациясининг Ўзбекистон бўйича директори Нил Маккейн, Жаҳон банкининг энергетика бўйича бош мутахассиси Ферҳат Эсен ҳамда бошқа вакиллар иштирок этди.

Учрашув давомида томонлар давлат корхоналарини трансформация қилишда MIGA'нинг амалий кўмаги юзасидан фирк алмашди. 

Жаҳон банки гуруҳи томонидан бу борада таклиф этилаётган хизмат турлари бўйича тақдимот ўтказди. 

Учрашув якунида томонлар иқтисодиётнинг устувор тармоқларида кафолат воситаларини қўллаш истиқболларини кенгайтириш борасида ҳамкорлик қилишга келишиб олди.