Ўзбекистон GGGI ва КОICA билан Париж битимини амалга оширишни муҳокама қилди

Тошкент, Ўзбекистон (UzDaily.uz) — Қурилиш ва уй-жой коммунал хўжалиги вазирлигида Глобал Яшил Ривожланиш Институти (GGGI) ҳамда Корея Халқаро Ҳамкорлик Агентлиги (КОIСА) вакиллари билан Ўзбекистоннинг Париж келишуви доирасидаги мажбуриятларини бажаришни кучайтириш масалаларига бағишланган учрашув бўлиб ўтди.

Мулоқот давомида бинолар, иситиш ва совутиш тизимлари, коммунал хизматлар инфратузилмаси ҳамда иссиқхона газлари чиқиндиларини камайтириш бўйича устувор йўналишлар муҳокама қилинди.

Шунингдек, амалдаги сиёсат ва стратегиялар, MRV маълумотлари ҳолати, мавжуд бўшлиқлар ҳамда соҳада салоҳиятни ошириш эҳтиёжлари кўриб чиқилди.

Томонлар Париж келишувининг 6-моддаси бўйича ҳамкорлик механизмларини ривожлантириш, келгусида амалга оширилиши мумкин бўлган пилот ташаббусларни белгилаш ва КОIСА томонидан ишлаб чиқилаётган лойиҳа концепциясини такомиллаштириш юзасидан фикр алмашди.

Учрашувда вазирликнинг тегишли бошқармалари ва бўлимлари масъуллари иштирок этди.