Навоий-Учқудуқ автомагистралида содир бўлган йўл-транспорт ҳодисасида беш киши ҳалок бўлди

Тошкент, Ўзбекистон (UzDaily.uz) — Навоий — Зарафшон — Учқудуқ автомобиль йўлида содир бўлган йўл-транспорт ҳодисаси оқибатида беш киши ҳалок бўлди. Бу ҳақда Kun.uz нашри ўз манбасига таяниб хабар берди.

Авария 7 март куни соат тахминан 16:30 ларда Навоий вилояти Канимех тумани ҳудудидан ўтувчи трасса қисмида содир бўлган. Тўқнашувда Kia ва Chery русумли автомобиллар иштирок этган.

Нашр маълумотига кўра, ҳар икки транспорт воситаси ҳам белгиланган тезлик меъёридан юқори тезликда ҳаракатланган.

Ҳодиса оқибатида Kia автомобилида бўлган уч нафар киши, шунингдек Chery автомобили ҳайдовчиси ва йўловчиси ҳалок бўлган.

Ҳалок бўлганлардан уч нафари воқеа жойидаёқ вафот этган.

«Акам Навоий кон-металлургия комбинатида ишларди. Ўша куни у Зарафшонга йўл олган эди. Афсуски, шундай бахтсиз ҳодиса юз берди. У жуда меҳрибон инсон эди ва ҳеч кимга ёмонлик тиламасди», — деди Kun.uz га Chery автомобили ҳайдовчиси Санжар Нурмахмедовнинг яқинларидан бири.

Ҳалок бўлганлар орасида «Zarafshon kanal» Telegram канали администратори, 17 ёшли Умиджон Тухтамуродов ҳам бўлган.

11 март куни мазкур каналда Навоий — Зарафшон — Учқудуқ (A-379) трассасининг ҳолати ва унда тез-тез содир бўлаётган йўл-транспорт ҳодисалари ҳақида пост эълон қилинган.

«Агар “Инициатив бюджет” лойиҳаси доирасида A-379 йўлини таъмирлаш ташаббуси илгари сурилса, биз ва маҳаллий аҳоли уни қўллаб-қувватлашга ва фаол овоз беришга тайёрмиз», — дейилади канал хабарида.

Аввалроқ, февраль ойида Навоий вилояти Канимех туманида содир бўлган яна бир йўл-транспорт ҳодисаси оқибатида тўрт киши ҳалок бўлган эди. Ўшанда авария сабаби сифатида қувиб ўтиш қоидаларининг бузилиши кўрсатилган.