Тошкент, Ўзбекистон (UzDaily.uz) — Тошкент шаҳрида пиёдаларга йўл бермаган ҳайдовчиларга нисбатан жарималар қўлланилиши бошланди. Бундай ҳолатлар эндиликда сунъий интеллект элементлари билан жиҳозланган интеллектуал камералар орқали автоматик тарзда қайд этилади. Йўл ҳаракати хавфсизлиги хизмати маълумотига кўра, тизим иш бошлаган дастлабки уч кунда 1719 та қоидабузарлик ҳолати аниқланган.

Ўзбекистон Республикаси Вазирлар Маҳкамасининг қарорига мувофиқ, 2025 йил июн ойидан бошлаб мамлакат бўйлаб замонавий фото ва видео қайд этиш тизимларини босқичма-босқич ўрнатиш ишлари олиб борилмоқда. Мазкур тизимларни жорий этишдан кўзланган мақсад — йўлларда хавфсизликни ошириш, ҳаракат қоидаларига риоя этилишини назорат қилиш ҳамда инсон омили сабабли содир бўладиган қонунбузарликларни тезкор аниқлашдир.

Хусусан, “TELECOM SOFT” МЧЖ томонидан шаҳарнинг ўнта йўл участкалари интеллектуал видеокузатув тизимлари билан жиҳозланди. Ушбу тизимлар ҳайдовчилар пиёдаларга йўл бермаган ҳолатларни автоматик равишда аниқлай олади.

2025 йилнинг охиригача мамлакатнинг турли ҳудудларидаги яна ўттизта светофорсиз пиёдалар йўлакларига шундай замонавий мажмуаларни ўрнатиш режалаштирилган.