Шавкат Мирзиёев Қирғизистон Президенти Садир Жапаров ва Қирғизистон халқига Рамазон ҳайити муносабати билан табрик йўллади

Тошкент, Ўзбекистон (UzDaily.uz) — Ўзбекистон Республикаси Президенти Шавкат Мирзиёев Қирғизистон Республикаси Президенти Садир Жапаров ҳамда Қирғизистон халқига Рамазон ҳайити муносабати билан табрик йўллади.

Қирғизистон Президенти матбуот хизмати хабарида таъкидланишича, ҳар икки халқ асрлар давомида эзгулик, меҳр-шафқат, ҳамжиҳатлик ва бирдамлик тимсоли бўлиб келаётган ушбу муқаддас байрамни интизорлик билан кутади ва уни алоҳида шодлик билан нишонлайди.

Ўз табригида Мирзиёев сўнгги йиллардаги қўшма тизимли ишлар ва сиёсий ирода туфайли Ўзбекистон ва Қирғизистон ўртасидаги кўп қиррали ва узоқ муддатли муносабатлар, шунингдек стратегик шериклик янги босқичга кўтарилганини таъкидлади.

Ўзбекистон Президенти, шунингдек, Садир Жапаровга мустаҳкам соғлиқ, оилавий бахт ва давлат фаолиятида муваффақиятлар, Қирғизистон халқига эса тинчлик, янада тараққиёт ва равнақ тилади.