Тошкент, Ўзбекистон (UzDaily.uz) — Самарқанд вилоятидаги ёқилғи қуйиш шохобчасида юз берган портлаш оқибатида икки киши ҳалок бўлди. Бу ҳақда Саноат, радиация ва ядро хавфсизлиги бўйича қўмита расмий баёнотида маълум қилинди.

Мавжуд маълумотларга кўра, ҳодиса 2025 йил 7 май куни соат 15:06 да Каттақўрғон туманидаги «Куштепа» маҳалласида жойлашган «YIGITALI» МЧЖга қарашли автозаправка шохобчаси ҳудудида содир бўлган.

Ҳодиса вақтида ҳар бири 10 куб метр ҳажмдаги икки ер ости резервуарига дизель ёқилғиси қуйилаётган бўлган. Шу пайтда резервуарларга ЗИЛ русумли автомашина уланган бўлган.

Ёнғин чиқиши натижасида, икки киши ҳалок бўлган, яна бир нафар фуқаро тан жароҳати олиб, шифохонага етказилган.

Ҳодиса сабаблари ўрганилмоқда, тергов ишлари олиб борилмоқда.