Тошкент, Ўзбекистон (UzDaily.uz) — Ўзбекистон Савдо-саноат палатаси раиси биринчи ўринбосари Давронбек Қурбонов раҳбарлигидаги делегация Австриянинг Иннсбурк шаҳрида хизмат сафари доирасида “INN Cubator” бизнес-инкубатори фаолияти билан танишди.

2014 йилда Австрия Иқтисодий палатаси ва Иннсбурк университети ҳамкорлигида ташкил этилган ушбу инкубаторнинг асосий мақсади — танлаб олинган стартап лойиҳаларини 6 ой давомида моддий-техник жиҳатдан қўллаб-қувватлаш ва уларни ҳаётга тадбиқ этишга кўмаклашишдан иборат. Шу вақтга қадар у 900 дан ортиқ лойиҳанинг амалга ошишига ёрдам берган.

Делегация аъзолари лойиҳаларни саралаш, молиялаштириш, синовдан ўтказиш ҳамда тайёр маҳсулот асосида бизнес йўлга қўйиш механизмлари ҳақида батафсил маълумотга эга бўлди.

Учрашув якунида Ўзбекистонда бизнес-инкубаторлар фаолиятини такомиллаштириш бўйича тажриба алмашиш ва ҳамкорлик йўлга қўйиш, шунингдек икки мамлакат ташкилотлари ўртасида тизимли мулоқот ўрнатишга келишиб олинди.