Ўзбекистонга Яқин Шарқ мамлакатларидан 9 мингдан ортиқ юртдошлар эвакуация қилинди

Тошкент, Ўзбекистон (UzDaily.uz) — 2026 йил 1 мартдан 5 мартгача бўлган даврда Ўзбекистонга мамлакатнинг 9 361 нафар фуқароси эвакуация қилинди. Бу ҳақда Ўзбекистон Ташқи ишлар вазирлиги хабар берди.

Эвакуация қилинганларнинг асосий қисми — 8 114 нафар фуқаро Саудия Арабистонидан мунтазам ва қўшимча чартер авиақатновлари орқали ватанга қайтарилган. Бирлашган Араб Амирликларидан 1 192 нафар фуқаро, Эрондан — 23 нафар, Баҳрайндан — 25 нафар, Уммондан эса — 7 нафар фуқаро юртга олиб келинган.

ТИВда таъкидланишича, юртдошларни ватанга қайтариш чоралари тизимли ва босқичма-босқич амалга оширилмоқда. Ҳозирги вақтда эвакуация асосан ҳаво ҳудуди фуқаролик авиацияси учун очиқ бўлган мамлакатлардан амалга оширилмоқда. Минтақанинг бошқа давлатларида ҳам ҳаво ҳудуди очилиши билан фуқароларни қайтариш ишлари давом эттирилади.

Ташқи ишлар вазирлиги фуқароларни хотиржамликни сақлашга, ваҳимага берилмасликка ва вазиятга вазминлик билан ёндашишга чақиради. Шунингдек, хорижий мамлакатларда бўлиш қоидаларига қатъий риоя қилиш ва фақат Ўзбекистон Республикаси давлат органлари ҳамда дипломатик ваколатхоналари томонидан тарқатилаётган расмий ахборотларга таяниш тавсия этилди.