Тошкент, Ўзбекистон (UzDaily.uz) — Жорий йилнинг 28 январь куни Ўзбекистон Республикаси Бош вазир ўринбосари – Иқтисодиёт ва молия вазири Жамшид Қўчқоров раҳбарлигида халқаро молия институтлари ва ташкилотлар билан ҳамкорликда “Яшил инновацион технологиялардан фойдаланган ҳолда энергия самарадорликни ошириш ва барқарор иссиқлик таъминотини таъминлаш масалалари” мавзусидаги давра суҳбати ташкил этилди.

Ушбу тадбир мавжуд биноларнинг энергия самарадорлигини ошириш ва марказлашган иссиқлик таъминотини ислоҳ қилиш ҳамда барқарор ривожлантиришга қаратилган Президент қарори лойиҳаси бўйича эксперт фикрлари ва тавсияларини йиғишга қаратилди.

Ушбу тадбирда халқаро молия институтлари ва ташкилотлар вакиллари билан бир қаторда вазирлик ва идоралар, жумладан, Қурилиш ва уй-жой коммунал хўжалиги, Энергетика, Соғлиқни сақлаш ҳамда Мактабгача ва мактаб таълими вазирлигининг мутасаддилари иштирок этди.

Давра суҳбати давомида мавжуд биноларнинг энергия самарадорлигини ошириш, қайта тикланувчи энергия манбаларидан фойдаланиш ва энергия йўқотишларини камайтириш бўйича кенг кўламли чора-тадбирлар ишлаб чиқиш, шунингдек, марказлашган иссиқлик таъминоти тизимини таҳлил қилиш натижалари муҳокама қилиниб, соҳадаги мавжуд муаммоларни бартараф этиш ва замонавий технологик ечимларни жорий қилиш зарурлиги қайд этилди, мутахассисларнинг бу йўналишдаги фикр-мулоҳазалари алмашилди. Шу муносабат билан кўрсатилган масалалар ҳамда ислоҳотларни аниқ ёндашувлар асосида амалга оширишни кўзда тутувчи Президент қарори лойиҳасини киритиш белгиланди.

Қарор лойиҳасида энергия тежамкор технологияларни жорий этишни кенгайтириш, биноларнинг энергия самарадорлигини ошириш, қайта тикланадиган энергия манбаларини интеграция қилиш, энергия йўқотишларини минималлаштириш ҳамда барқарор иссиқлик таъминотини ривожлантириш чоралари белгиланган.

Қарор лойиҳасини ишлаб чиқишда Жаҳон банки, Европа Тикланиш ва Тараққиёт банки, Осиё Тараққиёт банки, Халқаро энергетика агентлиги ва бошқа халқаро ҳамкорларнинг тажриба ва тавсиялари тўлиқ инобатга олинган.

Давра суҳбати доирасида Жаҳон банкининг Инфратузилма бўйича минтақавий директори Чарлз Кормиэр, Жаҳон банкининг Энергетика ва қазиб олиш саноати бўйича минтақавий менежери Стефани Гил ҳамда Осиё Тараққиёт банкининг катта энергетика мутахассиси Алфредо Бано каби халқаро экспертлар бинолар энергия самарадорлиги ва иситиш тизимларини такомиллаштириш бўйича тақдимот қилиб, стратегиялар ва фикрлар билан бўлишдилар. Бирлашган Миллатлар Тараққиёт Дастури (UNDP), Халқаро молия корпорацияси (IFC), GIZ ва бошқа ташкилотлар вакиллари ҳам Ўзбекистоннинг иссиқлик таъминоти секторини модернизация қилиш учун “яшил технологиялар”дан фойдаланиш бўйича аҳамиятли таклифларини билдирдилар.

Муҳокамаларда иситиш хизматлари сифатини ва ишончлилигини ошириш, ижтимоий объектларда энергия самарадорлигини яхшилаш, энергия тежамкор технологияларни жорий этиш, хорижий инвестицияларни жалб қилиш имкониятларини кенгайтириш ва соҳанинг молиявий барқарорлигини таъминлаш масалаларига алоҳида эътибор қаратилди. Бундан ташқари, халқаро молия институтлари маблағлари ҳисобидан энергия самарадорлигини оширишга қаратилган дастурларни амалга ошириш ва уларнинг самарадорлигини таъминлаш бўйича фикр-мулоҳазалар алмашилди.

Тадбир якунида мазкур қарор мамлакатда энергия барқарорлигини таъминлаш, иситиш хизматлари сифати ва ишончлилигини ошириш, соҳада хорижий инвестицияларни жалб қилиш учун қулай шароитлар яратиш ҳамда мамлакатимизда энергия самарадорлик бўйича янги бозорни шакллантиришдаги аҳамияти таъкидланди. Давра суҳбати давомида давлат идоралари ва халқаро ҳамкорлар ўртасидаги доимий ҳамкорликнинг муҳимлиги ва ислоҳотларни муваффақиятли амалга ошириш орқали Ўзбекистонда энергия самарадорлигини оширишга қаратилган саъй-ҳаракатларни бирлаштириш зарурлиги қайд этилди.