Тошкент, Ўзбекистон (UzDaily.uz) — Жорий йил 12 декабрь куни Германия Федератив Республикасининг Франкфурт шаҳрида икки мамлакат тўқимачилик, озиқ-овқат ҳамда қурилиш соҳаларида фаолият юритувчи ишбилармонлар иштирокида Ўзбекистон-Германия бизнес форуми ҳамда В2В форматидаги учрашувлар бўлиб ўтди.

Мазкур тадбир Ўзбекистон Савдо-саноат палатаси, Ўзбекистоннинг Германиядаги элчихонаси ҳамда "MUSIАD Hessen e.V" уюшмаси билан ҳамкорликда ташкил этилди.

MUSIАD — мустақил саноатчилар ва ишбилармонлар уюшмаси бўлиб, унинг 12 000 дан ортиқ аъзолари мавжуд. MUSIАDнинг Германияда 10 та, Европа бўйлаб 22 та, бутун дунё бўйлаб 168 та ваколатхонаси мавжуд. Ташкилот Туркия экспортининг 25 фоизини амалга оширади.

Форумда Ташқи ишлар вазирининг ўринбосари Олимжон Абдуллаев, Савдо-саноат палатаси раиси ўринбосари Дилшод Расулов ҳамда "MUSIАD Hessen e.V" раҳбари Мухсин Кидик ўз нутқлари билан иштирок этдилар.

Тадбир давомида мамлакатимизнинг инвестицион салоҳияти ҳамда тадбиркорликнинг кенг истиқболлари бўйича тақдимотлар намойиш этилди. Шунингдек, форум давомида икки давлат ўртасида олиб борилаётган ислоҳотлар ҳамда эришилган келишувлар натижалари бўйича муҳокамалар ўтказилди.

Ҳозирги кунда Ўзбекистонда Германия сармояси иштирокида 221 та корхона фаолият кўрсатмоқда: 114 та100 фоиз Германия капитали иштирокида ва 107 та қўшма корхоналар ҳисобланади.

Форум якунлари бўйича, Ўзбекистон ҳамда Германия ишбилармонлари ўртасида В2В форматидаги учрашувлар ташкил этилиб, иштирокчилар ўзаро манфаатли савдо шартномаларини тузиш борасидаги масалаларни атрофлича ишлаб чиқишга муваффақ бўлди.