Тошкент, Ўзбекистон (UzDaily.uz) — Вилоят ҳокими Хайрулло Бозоров Хитойнинг Шаньдун провинциясидаги йирик ишлаб чиқариш тармоқларига эга “Woerde Group” компанияси раиси Лин Бо бошчилигидаги хитойлик ишбилармонлар делегациясини қабул қилди.

Вилоят ҳокими Хайрулло Бозоров бошчилигидаги вилоят делегацияси апрель ойида Хитойга ташрифи давомида “Woerde Group” компанияси раҳбарияти билан учрашув ўтказиб, самарали келишувларга эришганди. Эндиликда бу амалий босқичга ўтиб, вилоятимизда ҳамкорликда янги лойиҳалар бошланмоқда. Учрашувда келишувлар доирасидаги истиқболли ҳамкорлик масалалари муҳокама қилинди. Хитойда ўтказилган тақдимотлар натижасида кўплаб ишбилармонлар Фарғонага сармоя киритишга катта қизиқиш билдираётгани, қисқа вақт ичида бу ўзининг амалий самараларини бериши қайд этилди.

Вилоят раҳбари Хитой билан ҳудудлараро ҳамкорлик тобора кенгайиб бораётганини, хусусан, вилоятимиз билан Шаньдун провинцияси ўртасидаги дўстона ва ишончли алоқалар мустаҳкамланаётганини таъкидлаб ўтди. Мулоқот давомида Фарғона вилоятида махсус технопарк ташкил этиш, унда шаньдунлик тадбиркорларнинг лойиҳаларини жойлаштириш имкониятлари кўриб чиқилди. Ҳозирдан бунга қизиқиш кучли эканлиги билдирилиб, қувурлар ишлаб чиқариш лойиҳаси тақдимот қилинди.

Вилоят раҳбари билдирилган таклифларни қўллаб-қувватлашини, вилоятимизнинг ҳар бир ҳудудида махсус саноат зоналари ташкил этилаётганини маълум қилиб, келишувлар доирасида ўзаро манфаатли лойиҳаларни амалга оширишда ҳар томонлама кўмакка тайёр эканлигини таъкидлади. Учрашув якунида Фарғона вилояти ҳамда “Woerde Group” компанияси ўртасида Фарғонада Шаньдун провинцияси савдо уйини, Шаньдунда эса Фарғона вилояти савдо уйини ташкил этиш бўйича меморандум имзоланди.