Зoмин туманида икки ёшли боланинг ҳалок бўлишига сабабчи бўлган ҳайдовчи етти йилга озодликдан маҳрум этилди

Тошкент, Ўзбекистон (UzDaily.uz) — Жиззах вилояти Зoмин туман суди икки ёшли бола ҳалок бўлган йўл-транспорт ҳодисаси бўйича ишни кўриб чиқиб, ҳукм чиқарди. Айбдор деб 31 ёшли эркак — «Зoмин» санаториясида фельдшер бўлиб ишлаган шахс топилди.

Суд уни етти йил муддатга манзил-колонияда жазо ўташ шарти билан озодликдан маҳрум қилди ҳамда уч йилга транспорт воситаларини бошқариш ҳуқуқидан маҳрум этди.

Фожиали ҳодиса ўтган йил ёзида содир бўлган. Тергов маълумотларига кўра, ҳайдовчи орқага ҳаракатланиш вақтида болани пайқамай қолиб, уни уриб кетган.

Шундан сўнг у тезкор хизматларга мурожаат қилиш ўрнига боланинг жасадини ўз уй ҳовлисига олиб кириб, дарахт остида қолдирган.

Болани қидириш ишлари икки ҳафта давом этган. Уни жасади қишлоқ атрофидаги тоғли ҳудуддан топилган. Тергов жараёнида ҳайдовчининг ҳам болани уриб кетгани, ҳам унинг ўлими фактини яширгани аниқланган.

Судланувчининг ҳаракатлари Ўзбекистон Республикаси Жиноят кодексининг 117-моддаси 2-қисми («Одам ўлимига сабаб бўлган хавфда қолдириш») ва 266-моддаси 2-қисми («Одам ўлимига олиб келган ҳаракат хавфсизлиги қоидаларини бузиш») билан квалификация қилинди.

Суд ҳукми йўл ҳаракати қоидаларини бузган шахсларга нисбатан қатъий ёндашувни акс эттириб, йўл-транспорт ҳодисаси оқибатларини яшириш орқали инсон ўлимига сабаб бўлганлик учун жавобгарлик муқаррар эканини таъкидлайди.