Хожиакбар Алижонов «Персеполис» билан бир ярим йиллик шартнома имзоламоқда

Тошкент, Ўзбекистон (UzDaily.uz) — Ўзбекистон миллий терма жамоаси ҳимоячиси Хожиакбар Алижонов «Пахтакор» клубини тарк этиб, фаолиятини Эроннинг «Персеполис» жамоасида давом эттиради. Тошкент жамоасининг чап қанот ҳимоячиси трансфер бўйича келишувга эришди ва бир ярим йил муддатга шартнома имзолайди.

Мавжуд маълумотларга кўра, футболчининг трансфер қиймати 800 минг АҚШ долларидан 1 миллион АҚШ долларигача бўлиб, ушбу маблағни «Персеполис» «Пахтакор»га тўлаб беради.

Шунингдек, Алижоновнинг ўзи учун молиявий шартлар сезиларли даражада яхшиланиши, унинг маоши эса анча ошиши маълум қилинмоқда.

28 ёшли ҳимоячи «Пахтакор» клуби тарбияланувчисидир. У пойтахт жамоасининг асосий таркиби сафида барча мусобақаларда жами 229 та ўйин ўтказган.