Хитойнинг Weichai Lovol компанияси Фарғонада қишлоқ хўжалиги техникаси ишлаб чиқаришга сармоя киритмоқда

Тошкент, Ўзбекистон (UzDaily.uz) — Хитойнинг “Weichai Lovol Intelligent Agricultural Technology Co., LTD” компанияси Фарғонада қишлоқ хўжалиги техникаларини ишлаб чиқаришни йўлга қўйиш учун инвестиция киритишга катта қизиқиш билдирмоқда.

Бу ҳақида вилоят ҳокимининг маҳаллий саноатни ривожлантириш масалалари бўйича маслаҳатчиси Акмалжон Пўлатов билан Хитой компанияси бошқарув раиси Сун Деминг билан ўтган учрашувда маълум қилинди.

Мазкур компания Хитойдаги энг йирик аграр техника ишлаб чиқарувчи компаниялардан бири бўлиб, “Weichai Lovol” корпорацияси таркибига киради.

У қишлоқ хўжалиги соҳасида юқори технологияли, энергия тежамкор ва интеллектуал ечимлар яратишга ихтисослашган. Тракторлар, комбайнлар ва ҳосил йиғиш техникалари, қишлоқ хўжалиги агрегатлари ишлаб чиқаради. Шунингдек, рақамли бошқарув тизимлари, GPS навигацияли техникалар ва автоматлаштирилган фермер хўжалиги платформаларини интеллектуал аграр ечим сифатида тақдим этади.

Вилоят ҳокимлигида ўтган учрашувда Хитой компанияси фаолият турларидан келиб чиқиб Фарғонада амалга оширилиши режалаштирилган истиқболли лойиҳалар муҳокама қилинди.

Акмалжон Пўлатов замонавий инвестицион лойиҳалар вилоят ҳокимлиги раҳбарияти томонидан доимо қўллаб-қувватланишини маълум қилди. Келгусидаги ҳамкорлик масалалари келишиб олинди.