Тошкент, Ўзбекистон (UzDaily.uz) — “Ўзбекистон миллий электр тармоқлари” АЖ ва Хитойнинг “Shandong Electrical Engineering & Equipment Group Co., Ltd. ” компанияси ўртасида Тошкент шаҳридаги 220 кВ кучланишли «Зафар» ва «Файзиобод» подстанцияларини лойиҳалаштириш, етказиб бериш ва ўрнатиш ( EPC) ишлари бўйича шартнома имзоланди.

Лойиҳанинг асосий мақсади — ушбу подстанцияларни замонавий элегаз изоляцияли комплект тақсимловчи қурилма (КРУЭ) подстанцияларига айлантиришдир.

Лойиҳа амалга оширилиши натижасида қуйидаги устувор натижаларга эришилади:

• инсон омилининг таъсирини минималлаштириш;
• ташқи иқлим шароитларининг салбий таъсирини камайтириш;
• эксплуатация ва техник хизмат кўрсатувчи ходимларнинг хавфсизлигини ошириш;
• подстанцияларнинг ишончли ишлашини таъминлаш;
• атроф-муҳитга салбий таъсирни камайтириш;
• подстанцияларнинг замонавий эстетик кўринишини шакллантириш;
• иш фаолиятини оптималлаштириш;
• илғор технологиялар асосида ишлаб чиқарилган замонавий ускуналардан фойдаланиш.

Мазкур лойиҳа Ўзбекистон энергетика тизимини замонавийлаштириш ва унинг барқарор ишлашини таъминлашга хизмат қилади.