Тошкент, Ўзбекистон (UzDaily.uz) — Тошкент шаҳрида Халқаро болаларни ҳимоя қилиш кунига бағишланган «Болалар учун мулоқот: Марказий Осиё ва ЮНИСЕФ» минтақавий форуми бўлиб ўтди. Бу ҳақда Zamin жамғармаси матбуот хизмати хабар берди.

Форум оналар ва болаларга тиббий хизмат кўрсатиш сифатини яхшилаш, умумий устувор йўналишларни белгилаш, самарали стратегияларни муҳокама қилиш орқали халқаро ҳамкорликни мустаҳкамлаш учун майдонга айланди. Айниқса, биринчи босқич тиббий-санитария ёрдамини ривожлантириш ҳамда болалар онкологияси соҳасида мултидисциплинар ёндашувни жорий этиш масалаларига алоҳида эътибор қаратилди.

Форумда ЮНИСЕФ, Соғлиқни сақлаш жаҳон ташкилоти (СЖТ), БМТ, Қозоғистон, Қирғизистон, Тожикистон, Туркманистон, Ўзбекистон, Озарбайжон соғлиқни сақлаш вазирликлари ва Zamin жамғармаси раҳбарлари иштирок этди.

Zamin жамғармаси Кенгаши раиси Зироат Мирзиёева ўз мурожаатида шундай деди:

«Биз ҳар бир боланинг соғлиғи ва фаровонлигини таъминлаш бўйича тизимли ишларни давом эттиришга қатъий бел боғлаганмиз. Айниқса, педиатрия тизими доирасида онкологик касалликларга қарши кураш дастурларини жорий этишда мултидисциплинар ёндашувни қўллашга катта эътибор қаратмоқдамиз. Энг катта муваффақиятимиз — бу хурсанд болаларнинг кулигу, ота-оналарнинг хотиржамлиги ва ишончидир».

Марказий Осиё давлатлари болалар соғлиғини муҳофаза қилиш бўйича халқаро стандартларга содиқлигини яна бир бор тасдиқлаб, биринчи босқич тиббий-санитария ёрдамини мустаҳкамлашни барқарор соғлиқни сақлаш тизимига олиб борувчи асосий омил сифатида қайд этди.

ЮНИСЕФ ижрочи директори Кэтрин Рассел шундай таъкидлади:

«Марказий Осиёда соғлиқни сақлаш тизимлари инфекцион бўлмаган касалликлар ва оналик ҳамда болалар ўлими каби муаммоларга дуч келмоқда. Бирламчи тиббий ёрдамни кучайтириш энг самарали ва тўғри стратегия ҳисобланади».

Форумнинг муҳим қисмларидан бири болалар ва ўсмирлар учун онкологик ёрдам тизимини яхшилашга бағишланди. Ушбу ёрдам давлат дастурлари тизимига интеграция қилинган, профилактика, эрта диагностика ва даволашни ўз ичига олган, малакали мутахассислар, психо-ижтимоий кўмак ва рақамли мониторинг билан таъминланган бўлиши лозим.

Клиник ёрдамдан ташқари, бола учун оилавий ва ижтимоий муҳитда қўллаб-қувватлашни таъминловчи ота-оналарга таълим бериш, ўзаро ёрдам гуруҳлари ва оилавий маслаҳат хизматлари ҳам жорий этилиши керак.

СЖТнинг Европа минтақавий бюроси директори Ҳанс Клюге ўз сўзида шундай деди:

«Болаларнинг соғлиғи — бу халқимизнинг соғлиғи. Бу инсон капиталига, ижтимоий барқарорликка ва келажакни қуришдаги энг кучли инвестициядир. СЖТ ҳар доим бу йўлда сизлар билан бирга бўлишга тайёр».

Форумда болалар саратонига қарши кураш бўйича Академик халқаро хаб яратиш ғояси алоҳида эътиборга олинди. Хабнинг Кенгашига қатнашчи мамлакатлар раҳбарлари киритилди. Бу ташаббус минтақада илғор халқаро амалиётларни клиник ва илмий фаолиятга жорий этишни тезлаштиришга қаратилган.

ЮНИСЕФ ва СЖТ кўмагида Марказий Осиё давлатлари болалар ва ўсмирлар соғлиғини муҳофаза қилиш соҳасида ҳукуматлар, академик жамоатчилик, ҳамкорлар ва фуқаролик жамияти ўртасида ҳамкорликни ривожлантириш бўйича декларацияни қабул қилди.