Тошкент, Ўзбекистон (UzDaily.uz) — «Ўзкимёсаноат» АЖ таркибига кирувчи «Чирчиқ» кимё-индустриал технопарки резиденти «UZPLATINUM» МЧЖ ҚК ички бозорга маҳсулот етказиб берди.

Маҳсулотнинг биринчи партияси «JV Continaz» МЧЖ ҚК компанияси учун муваффақиятли етказиб берилди.

«JV Continaz» МЧЖ ҚК янги цианид кислота ишлаб чиқаришда каталитик тизимлардан фойдаланади.

UZPLATINUM - нафақат Ўзбекистонда, балки МДҲ мамлакатлари орасида (Россия Федерациясидан ташқари) платина гуруҳи металларидан каталитик тизимларни ишлаб чиқарувчи ягона компания ҳисобланади.

Компания маҳсулотлари кимё, нефтни қайта ишлаш ва нефть-кимё саноати корхоналари учун мўлжалланган.

Компания ўзи ишлаб чиқарган маҳсулотларни сотишни фаол ривожлантирмоқда. Ўзбекистон корхоналари билан хомашёни қайта ишлаш ва каталитик тизимларни етказиб бериш бўйича иккита оффтаке шартномаси имзолади.

Компаниянинг яқин келажакдаги режалари Ўзбекистоннинг иккита азот корхонаси билан узоқ муддатли шартномалар тузиш бўлиб, бу ўз навбатида республикада каталитик тизимларга бўлган эҳтиёжни 100 фоизга қоплайди.