UzAuto Motors Ўзбекистонда янги Chevrolet Traverse Z71 йўлтанламасини сотувга чиқармоқда

Тошкент, Ўзбекистон (UzDaily.uz) — «UzAuto Motors» АЖ янги Chevrolet Traverse Z71 йўлтанламас автомобилини харид қилиш бўйича шартномалар тузиш бошланганини маълум қилди. Автомобилни компаниянинг барча расмий дилерларидан харид қилиш мумкин.

Chevrolet Traverse — қудрат, замонавий технологиялар ва юқори даражадаги йўлтанламас имкониятларини ўзида мужассам этган уч қаторли SUV ҳисобланади. Янги версия 328 от кучига эга 2,5 литрли турбинага эга тўрт цилиндрли двигател билан жиҳозланган. Кучайтирилган осма тизими, оширилган клиренс ва тўлиқ етакчи тизими шаҳар шароитида ҳам, йўлсиз ҳудудларда ҳам динамик ҳаракат, юқори тортиш кучи ва барқарор бошқарувни таъминлайди.

Traverse ташқи кўриниши янада яққол йўлтанламас характерига эга бўлди: қора радиатор панжараси, кузовнинг мат ҳимоя элементлари, қизил буксирлаш илгаклари ва эксклюзив эмблемалар моделни йирик кроссоверлар сегментида ажратиб туради. Янгиланган олд ва орқа қисмлар, шунингдек, янги 18 дюймли ғилдирак дисклари автомобилнинг замонавий қиёфасини янада кучайтиради.

Traverse салоны қулайлик ва рақамли технологияларга йўналтирилган. Мультимедиа тизимининг марказий дисплеи 17,7 дюйм, рақамли асбоблар панели эса 11 дюйм диагоналга эга. Уч қаторли жойлашув барча йўловчилар учун кенг макон яратади, премиум материаллар эса моделнинг мақомини таъкидлайди. Chevy Safety Assist фаол хавфсизлик тизимларининг кенгайтирилган мажмуаси ҳайдовчи ва йўловчилар ҳимоясини оширади.

UzAuto Motors’да таъкидланишича, Chevrolet Traverse кўп қирралилик ва ҳаракат эркинлигини қадрлайдиган мижозлар учун мўлжалланган бўлиб, у кундалик шаҳар сафарларидан тортиб, саёҳатлар ва фаол дам олишгача бўлган эҳтиёжларни қондиришга мос келади.

Янгиланган Chevrolet Traverse Z71’нинг тавсия этилган чакана нархи 795 миллион сўмни ташкил этади.