Тошкентда илк бор MICHELIN Key халқаро мукофоти берилди

Тошкент, Ўзбекистон (UzDaily.uz) — Тошкент шаҳар ҳокимлиги хизмат кўрсатиш, меъморчилик ва умумий меҳмондўстликнинг юқори стандартларига мос келадиган меҳмонхоналарга бериладиган MICHELIN Key халқаро мукофоти билан табриклайди.

Ўзбекистон тарихида биринчи марта InterContinental Tashkent меҳмонхонаси ушбу мукофотга сазовор бўлди. MICHELIN Key мукофотининг берилиши пойтахтда туризм ва хизмат кўрсатиш инфратузилмасини ривожлантириш учун яратилган шарт-шароитлар халқаро талабларга жавоб бериши ва мунтазам равишда такомиллашиб бораётганидан далолат беради.

Бу эътироф нафақат алоҳида объект учун, балки бутун шаҳар учун ҳам аҳамиятли бўлиб, соҳанинг изчил ривожланишини ва Тошкентнинг халқаро сайёҳлик маконидаги мавқейининг мустаҳкамланишини акс эттиради.

Пойтахтда MICHELIN Key томонидан эътироф этилган биринчи объектнинг пайдо бўлиши хорижий меҳмонларнинг ишончини оширишга хизмат қилади ҳамда халқаро рейтинглар, таҳлиллар ва шаҳарни рақамли идрок этишда ҳисобга олинади.