Тошкентда Британиянинг етакчи компаниялари иштирокида чиқиндиларни қайта ишловчи завод қурилади

Тошкент, Ўзбекистон (UzDaily.uz) — Тошкент шаҳар ҳокими ўринбосари Абдулазиз Исроилов бошчилигидаги делегация Лондонга ташриф доирасида чиқиндиларни қайта ишлаш соҳасида Ўзбекистон ва Британия ўртасидаги ҳамкорликка бағишланган бизнес-форумда иштирок этди, деб хабар қилмоқда “Дунё” АА мухбири.

Мамлакатимизнинг Буюк Британиядаги элчихонасида ташкил этилган тадбирда Британия Экспортни молиялаштириш агентлиги (UKEF), “CDE Group”, “Kiverco”, “Fichtner”, “Operis” каби компаниялар вакиллари ва йирик сармоядорлар қатнашди.

Чиқиндиларни қайта ишлаш бўйича асбоб-ускуналар ишлаб чиқарувчи дунёдаги етакчи Британия компаниялари – “CDE Group” ва “Kiverco” томонидан Ўзбекистонда режалаштирилган лойиҳалар бўйича тақдимот ўтказилди.

Якунда “CDE Group” ва “Kiverco” компаниялари томонидан Тошкентда қурилиш режалаштирилган чиқиндиларни қайта ишловчи завод бўйича битим имзоланди.

Ўзбекистон делегациянинг Лондонда жойлашган чиқиндиларни қайта ишлаш объектларига сафари ташкил этилиб, ушбу йўналишдаги Британиянинг илғор тажрибаси ўрганилди.