Тошкент вилоятида икки қор кўчкиси содир бўлди

Тошкент, Ўзбекистон (UzDaily.uz) — 2026 йил 30 март куни Тошкент вилояти Бўстонлиқ туманидаги Чимён ҳудудида 1900–3000 метр баландликда бир вақтнинг ўзида икки қор кўчкиси кузатилди. Бу ҳақда Ўзгидромет матбуот хизмати маълум қилди.

Ҳар бир қор кўчки ҳажми тахминан 300 куб метрни ташкил этган. Ҳодиса оқибатида жабрланганлар ва зарарлар қайд этилмаган.

Метеорологик хизмат маълумотига кўра, қор кўчкиларига ёғган ёғингарчиликлар ва ҳаво ҳароратининг кескин ўзгариши сабаб бўлган.

Мутахассислар яқин ҳафтада қисқа муддатли ёмғирлар ва момақалдироқлар кузатилишини маълум қилди. Шу билан бирга, айрим ҳудудларда ҳаво ҳарорати 30 даража иссиқликкача кўтарилиши мумкин.

Ёмғир ва момақалдироқлар мамлакатнинг шимолий-ғарбий ҳудудларида, шунингдек, куннинг иккинчи ярмида марказий ва жанубий вилоятларнинг айрим туманларида кузатилади.