Тошкент Жаҳон савдо ташкилотига аъзо бўлиш йўлида Аргентина, Австралия ва Гондурас билан келишувларга эришди

Тошкент, Ўзбекистон (UzDaily.uz) — Ўзбекистон Жаҳон савдо ташкилотига аъзо бўлиш йўлида яна бир муҳим қадам ташлади.

Президентнинг ЖСТ масалалари бўйича вакили Азизбек Урунов маълум қилишича, шу ҳафта Женева шаҳрида мамлакат делегацияси Президент администрацияси раҳбари Саида Мирзиёева бошчилигида Аргентина, Австралия ва Гондурас билан бозорга кириш бўйича икки томонлама протоколларни имзолади.

Уруновнинг таъкидлашича, эришилган келишувлар Ўзбекистоннинг кўп томонлама савдо тизимига интеграция жараёнида ортиб бораётган қўллаб-қувватлаш ва ҳамкорликнинг муҳим тасдиғи ҳисобланади. У шунингдек, имзоланган ҳужжатлар билан бир қаторда яна икки ЖСТ аъзоси билан принципиал келишувларга эришилганини қайд этди.

«Бу келишувлар нафақат аъзолик бўйича музокараларни илгарилатади, балки иқтисодий ҳамкорлик учун янги йўналишлар очади, савдони диверсификация қилиш ва турли минтақалардаги шериклар билан алоқаларни мустаҳкамлаш имконини беради. Ҳар бир янги имзо Ўзбекистонни ЖСТга тўлақонли аъзо бўлиш сари яқинлаштиради. Бу эса мамлакат иқтисодиёти, бутун минтақа ва глобал савдо шериклари учун янги имкониятлар яратади», — деди у.

Ҳозирги кунда Ўзбекистон бозорга кириш бўйича 29 та келишувни имзолаган ва яна икки давлат билан дастлабки келишувларга эришган. Икки томонлама музокараларни тўлиқ якунлаш учун яна учта давлат билан шартларни келишиш керак.

Жорий йил июль ойида Тошкент Швейцария билан ЖСТга аъзо бўлиш бўйича музокараларни якунлаган эди.