Тошкент аэропорти Буюк Британия ва Европа Иттифоқи учун РА3 халқаро мақомини тасдиқлади

Тошкент, Ўзбекистон (UzDaily.uz) — Тошкент халқаро аэропортидаги юк терминали икки йўналиш – Буюк Британия ва Европа Иттифоқи учун RА3 (Regulated Agent Third Country) халқаро мақомининг ревалидация жараёнини муваффақиятли якунлади.

Ревалидация мустақил аккредитациядан ўтган аудиторлар томонидан «UzCargo» компаниясининг 2025 йил баҳорида янги, замонавий юк терминалига кўчиб ўтиши муносабати билан ўтказилди.

РА3 мақомининг тасдиқланиши терминалнинг юкларни қайта ишлаш бўйича Европа Иттифоқи ва Буюк Британиянинг авиация хавфсизлигининг барча талабларига жавоб беришини ва ушбу мамлакатларга тўғридан-тўғри ҳаво ташишлари учун юк ва почта жўнатмаларини тайёрлашни давом эттириш ваколатига эга эканлигини англатади.

Мутахассислар Uzbekistan Airports авиация хавфсизлиги департаменти томонидан амалга оширилган ишларнинг юқори савиясини қайд этиб, бу РА3 мақомининг қайта тасдиқланишида асосий омил эканлигини таъкидлашди.

Тошкент аэропортига UZ/RA3/00001-01 ва UK/RA3/00001-01 ноёб рўйхатга олиш рақамлари берилди, улар расмий Европа RА3 агентлари маълумотлар базасига киритилган бўлиб, 2028 йил августигача амал қилади.

Бу етказиб беришни тезлаштириб, логистика занжирларини соддалаштиради, ҳамкорлар учун вақт ва харажатларни қисқартиради, халқаро авиакомпаниялар ва логистика компаниялари учун жозибадорликни оширади.

Шу тариқа, Тошкент ўзини Марказий Осиёнинг асосий авиация маркази сифатида кўрсатиб, Европага халқаро ҳаво юкларини хавфсиз етказиб бериш занжирига қайта кириб, юкларни экспорт қилиш ва транзит қилиш имкониятларини кенгайтирди.