Тошкент, Ўзбекистон (UzDaily.uz) — 2025 йил 5 май — Шуҳратбек Қурбонов “TBC Bank” АТБ Бошқарув Раисининг бизнес сегменти учун тўловларни ривожлантириш ва хизмат кўрсатиш масалалари бўйича Маслаҳатчиси лавозимига тайинланди. Бу — компаниянинг Ўзбекистонда кичик ва ўрта бизнес (КЎБ) учун молиявий хизматларни ривожлантириш йўлидаги яна бир муҳим қадами бўлди.

Ўтган йили компания Ўзбекистон бозоридаги кичик ва ўрта бизнес (КЎБ) учун биринчи тўлиқ рақамли банк хизмати бўлган, барча банк ва унга боғлиқ операцияларни тўлиқ масофадан бошқариш имкониятини тақдим этувчи TBC Business платформасини ишга туширган эди. Жорий йилнинг апрель ойида эса ушбу хизмат мижозларига 300 миллион сўмгача (тахминан 23 минг АҚШ доллари) миқдорида, уч йилгача бўлган муддатда тўлиқ рақамли расмийлаштириладиган қисқа муддатли бизнес кредитлари тақдим этила бошланди.

Ника Курдиани, CEO TBC Uzbekistan: «Шуҳратбек Қурбоновни жамоамиз сафида кўришдан мамнунмиз. Унинг тайинланиши — компаниямизнинг Ўзбекистонда кичик ва ўрта бизнесни қўллаб-қувватлашга қаратилган комплекс молиявий ечимларни яратиш стратегиясидаги муҳим босқич ҳисобланади. Шуҳратбекнинг тажрибаси, бозорни чуқур тушуниши ва обрў-эътибори бизнинг онлайн банк хизматларимизни ривожлантиришга ва мамлакатдаги тадбиркорликни рағбатлантиришга хизмат қилади».

Шуҳратбек Қурбонов, TBC Bank Бошқарув Раиси Маслаҳатчиси: «Марказий Осиёдаги энг тез ривожланаётган компаниялардан бири — TBC Uzbekistan экотизими сафига қўшилганимдан хурсандман. Бизнинг вазифамиз — замонавий молиявий ечимлар, илғор технологиялар ва профессионаллар жамоасининг мувофиқлаштирилган ишлаши орқали мамлакатда кичик ва ўрта бизнес ривожи учун қулай шароитлар яратишдир».

Шуҳратбек Қурбонов бунга қадар олти йилдан ортиқ вақт давомида Humo тўлов тизимининг оператори бўлган Миллий банклараро процессинг марказига (МБПМ) раҳбарлик қилган. У янги лавозимига 2025 йил 5 май куни киришди.