Тимур Кападзе Фабио Каннаваронинг ёрдамчиси сифатида Ўзбекистон терма жамоасида ишни давом эттиради

Тошкент, Ўзбекистон (UzDaily.uz) — Ўзбекистон футбол ассоциацияси (ЎФА) биринчи вице-президенти Равшан Ирматов маълум қилишича, Тимур Кападзе миллий терма жамоада бош мураббий Фабио Каннаваронинг ёрдамчиси сифатида фаолият юритишни давом эттиради.

Унинг сўзларига кўра, бу қарор жамоа фаолиятида изчиллик ва барқарорликни таъминлаш мақсадида қабул қилинган. «Тимур Кападзе бош мураббий Фабио Каннаваронинг ассистенти сифатида ишини давом эттиради», — деб таъкидлади Ирматов.

Шунингдек, у Ўзбекистон терма жамоасининг тарихий ютуғи — жаҳон чемпионатига чиқишига ҳисса қўшган барча мутахассисларга миннатдорлик билдирди ва айниқса Сречко Катанец ҳамда Тимур Кападзенинг роли алоҳида эътироф этилди.

Тимур Кападзе эса миллий жамоа билан фаолиятини давом эттириши ҳақида шундай изоҳ берди: «Жамоага омад тилайман. Тўрт йилдан ортиқ вақт давомида Ўзбекистон терма жамоалари тизимида ишладим ва ишимни муносиб бажардим, деб ҳисоблайман. Янги бош мураббийга муваффақият ва ғалабалар тилайман», — деди у.

Мураббийнинг сўзларига кўра, у яқин икки ўқув-машғулот йиғинида жамоага ёрдам беришни режалаштирган: «Жорий ва кейинги йиғинда жамоага зарур қўллаб-қувватлашни кўрсатаман, кейин эса вақт кўрсатади», — деди Кападзе.

Эслатиб ўтамиз, 2006 йилги жаҳон чемпиони Фабио Каннаваро расман Ўзбекистон терма жамоасига бош мураббий этиб тайинланган эди.