The Athletic нашри Абдуқодир Хусановни 2026-йилги Жаҳон чемпионатининг энг яхши 100 нафар футболчиси қаторига киритди

Тошкент, Ўзбекистон (UzDaily.uz) — The Athletic нашри Ўзбекистон миллий жамоаси ҳимоячиси Абдуқодир Ҳусановни 2026 йилги жаҳон чемпионатидаги энг яхши 100 футболчи рўйхатига киритиб, унга 86-ўринни берди.

Рейтингни Франция терма жамоаси ҳужумчиси Килиан Мбаппе бошчилик қилмоқда. Иккинчи ўринга Норвегия форварди Эрлинг Ҳоланд, учинчи ўринга эса Испания термаси вингери Ламин Ямал жойлашди. Биринчи ўнликка шунингдек Харри Кейн, Педри, Жуд Беллингем, Винисиус Жуниор, Лионель Месси, Кевин де Брейне ва Жанлуижи Доннарумма ҳам кирди.

2026 йилги жаҳон чемпионати 11 июндан 19 июлгача АҚШ, Канада ва Мексикада ўтказилади. Кенгайтирилган форматдаги мусобақада Ўзбекистон терма жамоаси ҳам иштирок этади ва жами 48 та миллий жамоа кураш олиб боради. Бугун гуруҳ босқичи таркибини белгилайдиган қуръа ташлаш маросими бўлиб ўтади.