Тошкент, Ўзбекистон (UzDaily.uz) — Суд органлари Темир йўл ташувлари хизматларини назорат қилиш бўйича қўмита ҳузуридаги Махсус комиссиянинг қарори қонуний эканини тасдиқлади. Унга кўра, "O‘ztemiryo‘lyo‘lovchi" АЖ ва "Shahar atrofida yo‘lovchi tashish" МЧЖ 792 186 нафар йўловчидан ноқонуний тарзда ушланган маблағларни қайтариши шарт.

Аввалроқ Қўмита томонидан ўтказилган текширувда, ушбу компаниялар темир йўл чипталарини сотиш жараёнида қонуний лимитдан ортиқ комиссия йиғимлари ундиргани аниқланган эди.

Қўмита ушбу маблағларни фуқароларга қайтариш, қонунбузарликларни бартараф этиш ҳамда келгусида бу каби ҳолатларнинг олдини олиш бўйича аниқ кўрсатмалар берган. Бироқ компаниялар бу талабларга рози бўлмай, судга мурожаат қилган.

Бир неча суд инстанцияларида кўриб чиқилган иш натижасида даъводор компанияларга рад жавоби берилди ва Қўмитанинг қарорлари ҳақли деб топилди. Суд ҳукмига кўра, ташувчи компаниялар нафақат ноқонуний ушланган маблағларни қайтариши, балки қонунга мувофиқ жарималарни ҳам тўлаши лозим.

Шу билан, Қўмита ҳаракатлари қонуний деб эътироф этилди, истеъмолчилар манфаатлари эса суд йўли орқали ҳимоя қилинди.