Шомуродов «Башакшехир» – «Анталяспор» учрашувида дубль қайд этди (голлар)

Тошкент, Ўзбекистон (UzDaily.uz) — Ўзбекистон терма жамоаси ва Туркиянинг «Истанбул Башакшехир» клуби ҳужумчиси Элдор Шомуродов Туркия чемпионатининг ўнинчи турида «Анталяспор»га қарши ўйинда дубль қайд этиб, юқори самарадорлигини давом эттирди.

Ҳисоб 22-дақиқаёқ очилди — Шомуродов ўнг қанотдан Креспо узатган тўпни аниқ зарба билан дарвозага жойлади. Биринчи бўлимнинг охирида «Башакшехир» устунлигини икки баробарга оширди — Нуно да Коста 45+4-дақиқада пенальтини аниқ амалга оширди. Шунинг олдидан «Анталяспор» майдонда бир киши кам бўлиб қолди — Догукан Синик иккинчи сариқ карточкани олди.

Танаффусдан кейин Нуно да Коста дубль қайд этиб, жамоасининг учинчи голини 53-дақиқада киритди. Учрашувнинг сўнгги қисмида Элдор Шомуродов яна бир бор ўз сўзини айтди — у 88-дақиқада иккинчи голини урди. Ўйин 4:0 ҳисоби билан «Истанбул Башакшехир» фойдасига якунланди.

Ишончли ғалаба туфайли клуб Туркия Суперлигаси жадвалида 10 та ўйиндан сўнг 10 очко тўплаб, 11-ўринга кўтарилди.

Элдор Шомуродов 6 та гол билан Туркия чемпионати тўпурарлар рўйхатида иккинчи ўринни эгаллаб турибди. У фақат «Трабзонспор» ҳужумчиси Пол Онуачуга бир гол фарқи билан (7 та гол) ютқазмоқда.