Тошкент, Ўзбекистон (UzDaily.uz) — 10 май куни Шаҳрисабз аэропорти “Silk Avia” авиакомпаниясининг ATR-72-600 самолётида Тошкент – ​​Шаҳрисабз йўналишида амалга оширилган биринчи рейсини қабул қилди. Анъанага кўра, самолёт сув аркаси, экипаж эса гуллар билан кутиб олинди.

Шу тариқа, 18 майдан бошлаб "Silk Avia" авиакомпанияси Тошкентдан Шаҳрисабзга ATR-72-600 самолётларида ҳафтасига тўрт марта – сешанба, пайшанба, жума ва шанба кунлари парвозларни амалга ошира бошлайди.

Aввалроқ Шаҳрисабзга парвозлар кичик сиғимга эга Let L-410 самолётларида амалга оширилган. Учиш-қўниш йўлаги ва юриш йўлагининг капитал таъмирланиши туфайли Шаҳрисабз аэродроми эндиликда ўрта масофага учувчи самолётларни қабул қилиш имкониятига эга бўлди, бу эса, ўз навбатида, сайёҳлик шаҳрига йўловчилар оқимининг ошишига хизмат қилади.