Саида Мирзиёева Юта штатидан келган делегация билан учрашди

Тошкент, Ўзбекистон (UzDaily.uz) — Ўзбекистон Президенти маъмурияти раҳбари Саида Мирзиёева Девид Беднар бошчилигидаги Юта штати (АҚШ) бизнес делегацияси билан мазмунли учрашув ўтказди. Учрашув давомида томонлар Ўзбекистон-Америка муносабатлари ривожланишида янги босқич бошланганини мамнуният билан қайд этдилар.

Президент Шавкат Мирзиёевнинг АҚШ фуқаролари учун визасиз режимни жорий этиш тўғрисидаги қарори икки мамлакат ўртасидаги бизнес ва гуманитар алоқаларни кенгайтириш йўлидаги муҳим қадам бўлиши алоҳида таъкидланди.

Президент Фармонига мувофиқ, АҚШ-Ўзбекистон Бизнес ва Инвестиция Кенгаши ташкил этилмоқда. Унинг фаолиятини мувофиқлаштириш учун Ўзбекистоннинг АҚШдаги элчихонасида вазир-маслаҳатчи лавозими ташкил этилмоқда.

Шунингдек, ушбу фармон асосида Ўзбекистон резидентлари Ўзбекистон банкларидаги ҳисобварақларидан маблағларни АҚШда корхоналар ташкил этиш, уларнинг капиталида иштирок этиш ёки филиалларини маблағ билан тўлдириш учун эркин ўтказишлари мумкин бўлади.

Ушбу қадам ўзбек тадбиркорларининг ташқи иқтисодий фаолиятини янада ривожлантириш, Қўшма Штатлар билан инвестиция ҳамкорлигини мустаҳкамлаш ва Ўзбекистоннинг очиқ ва замонавий иқтисодиёт сифатидаги янги қиёфасини шакллантиришга қаратилган.