Қонунчилик палатаси депутатларига яшил ҳудудлар учун 412 млн сўм ажратилади

Тошкент, Ўзбекистон (UzDaily.uz) — Ўзбекистон Республикаси Президенти Шавкат Мирзиёев «Яшил макон» умуммиллий лойиҳаси доирасида дарахт экиш тадбирида иштирок этди ҳамда Тошкент шаҳрида Миллий дендрологик паркни ташкил этишга старт берди.

Тадбир давомида давлат раҳбари аҳоли ва депутатларни жойларда яшил ҳудудлар барпо этишга кенгроқ жалб қилишни таклиф қилди. Агар илгари «Менинг боғим» дастури доирасида ҳар бир лойиҳа учун 250 млн сўмгача маблағ ажратилган бўлса, эндиликда бу миқдор 400 млн сўмгача оширилди. Ҳар бир яшил боғ ва жамоат парки учун аҳоли томонидан танланган, яшаш жойларига яқин ва сув таъминоти мавжуд бўлган ҳудудларда 1 гектаргача ер майдони ажратилади.

Жорий мавсумдан бошлаб, Олий Мажлис Қонунчилик палатасининг ҳар бир депутатига ўз сайлов округида яшил ҳудуд ва боғ ташкил этиш учун 412 млн сўмдан маблағ ажратилади. Ушбу қарор парламент аъзоларининг шаҳар ва қишлоқ ҳудудларини ободонлаштириш ҳамда кўкаламзорлаштириш ишларида фаол иштирокини кучайтиришга қаратилган.