Тошкент, Ўзбекистон (UzDaily.uz) — 25 февраль куни Ўзбекистон Савдо-саноат палатаси раиси биринчи ўринбосари Давронбек Қурбонов Қатар Савдо палатаси раиси шейх Халифа бен Жассим бен Муҳаммад Аль Тани билан учрашув ўтказди.

Қатарнинг импорти асосан қурилмалар, электр ва электрон ускуналар, автомобиллар, темир ва пўлат маҳсулотлари, шунингдек, ҳаво ва космик аппаратлардан ташкил топади. Бундан ташқари, мамлакат ҳарбий қурол-аслаҳалар, қимматбаҳо тошлар ва металллар, фармацевтика маҳсулотлари импорт қилинишини ҳам устувор йўналиш деб билади.

Учрашув давомида томонлар савдо-иқтисодий ҳамкорликни кенгайтириш, ўзаро инвестицияларни рағбатлантириш, бизнес кооперацияни ривожлантириш ва делегациялар ташрифларини ташкил этиш масалаларини муҳокама қилдилар.

Ўзбек-қатар Бизнес кенгаши 2023 йил 1 октябрда Доха шаҳрида ташкил этилган. Унинг фаолияти икки давлат ўртасида савдо-иқтисодий ва инвестициявий ҳамкорликни мустаҳкамлаш, тадбиркорлар ўртасида тўғридан-тўғри алоқаларни йўлга қўйиш, қўшма лойиҳаларни амалга ошириш ва ишбилармонлик муҳитини яхшилашга қаратилган.

Учрашув натижасида Қатарлик импортчилар делегациясининг жорий йилда Ўзбекистонга ташрифи ҳамда Ўзбек-қатар Бизнес кенгаши йиғилиши ўтказилиши бўйича келишувга эришилди.