Payme қайта ташкил этишни бошлади ва TBC Tech ни яратади

Тошкент, Ўзбекистон (UzDaily.uz) — Тўлов сервиси Payme қайта ташкил этиш жараёнини бошлади. Бу ҳақдаги маълумот 10 март куни openinfo.uz порталида эълон қилинди.

Қайта ташкил этиш Ўзбекистон Республикасининг амалдаги қонунчилигига мувофиқ ажратиб чиқариш шаклида амалга оширилади.

Payme бош директорига барча зарур ҳуқуқий ва ташкилий ҳаракатларни амалга ошириш, жумладан TBC Tech номли янги юридик шахс уставини тайёрлаш, бошқарув органлари тузилмасини ишлаб чиқиш ва бошқа тегишли ҳужжатларни тайёрлаш топширилди.

TBC Uzbekistan матбуот хизмати UzDaily нашрига изоҳ бериб, қайта ташкил этиш ташаббускори TBC Uzbekistan экотизимининг бош компанияси бўлган TBC Digital эканини маълум қилди.

Жараён доирасида янги юридик шахс — TBC Tech МЧЖ ташкил этилиши кўзда тутилган бўлиб, у Payme нинг технологик активларининг бир қисми ва жамоасини ўз зиммасига олади.

TBC Uzbekistan таъкидлашича, мазкур қарор экотизимни ривожлантириш бўйича стратегик режанинг бир қисми бўлиб, бизнес самарадорлиги ва масштабланиш имкониятларини оширишга қаратилган.

Компанияда айтилишича, қайта ташкил этишнинг жорий босқичи экотизимнинг IT функцияларини марказлаштиришга қаратилган.

TBC Uzbekistan эслатишича, ушбу стратегия доирасида аввалроқ, 2025 йил кузида экотизимнинг операцион функцияларини бирлаштирган TBC Operations компанияси ташкил этилган эди.

“TBC Tech ни ажратиб чиқариш технологик инфратузилмани ривожлантиришга кучларни жамлаш, янги сервисларни жорий этишни тезлаштириш ва рақамли молиявий хизматлар сифатини ошириш имконини беради”, — деб қўшимча қилинди TBC Uzbekistan да.

TBC Uzbekistan таъкидлашича, қайта ташкил этиш фақат ташкилий хусусиятга эга бўлиб, Payme нинг жорий фаолиятига таъсир кўрсатмайди. Барча сервислар тўлиқ ҳажмда ишлашда давом этмоқда, мижозлар ва ҳамкорлар олдидаги мажбуриятлар сақланиб қолади.

Грузиянинг молиявий гуруҳи TBC Bank Group 2023 йилда Payme тўлов тизимини сотиб олиш жараёнини тўлиқ якунлаб, унинг ягона эгасига айланган. Дастлаб 2019 йил апрелида TBC Bank Group компания акцияларининг 51 фоизини сотиб олган эди. Кейинчалик, 2023 йил май ойида гуруҳ қолган 49 фоиз акцияни ҳам сотиб олиб, ўз улушини 100 фоизга етказган.