Ўзметкомбинат делегацияси Хитойнинг етакчи саноат компаниясига ташриф буюрди

Тошкент, Ўзбекистон (UzDaily.uz) — «Ўзметкомбинат» акциядорлик жамияти делегацияси Хитой Халқ Республикасининг «Ҳангянг» компаниясига қарашли «Quzhou Hang Oxygen Gas Co., Ltd.» корхонасида бўлди. 

«Hangyangг» бугунги кунда Хитойда ҳаво ажратиш ускуналари ва саноат компрессорларини ишлаб чиқариш бўйича биринчи ўринда туради. Жаҳон бозорида эса криоген технологиялар йўналишида энг йирик беш ишлаб чиқарувчидан бири сифатида танилган. Ташриф давомида делегация корхонадаги ишлаб чиқариш жараёнлари, замонавий технологиялар ҳамда муҳандислик ечимлари билан яқиндан танишди.

«Quzhou Hang Oxygen Gas Co., Ltd.» «Hangyangг» нинг тўлиқ мулки бўлиб, саноат кислороди, юқори тозаликдаги азот ва аргон, тиббий кислород ҳамда электроника саноати учун мўлжалланган махсус газларни ишлаб чиқаради. 

Делегация ҳаво ажратиш қурилмалари, газларни суюлтириш технологиялари ва маҳсулотларни қувур линиялари ҳамда криоген транспорт тизимлари орқали етказиб бериш жараёнларини ўрганди. Корхонада юқори технологиялар паркига узлуксиз газ етказиб бериш тизими ва кунлик юзлаб тонна суюқ маҳсулот ишлаб чиқариш салоҳияти мавжуд.

Ташриф давомида Бекобод кислород ишлаб чиқариш корхонаси фаолияти ҳам муҳокама қилинди. Ушбу корхона «Ўзметкомбинат»нинг кислород, азот ва бошқа техник газларга бўлган эҳтиёжини барқарор таъминлаб келаётган муҳим бўлинма ҳисобланади. 

«Hangyangг» раҳбарияти ўз тажрибаси, технологик ишланмалар ва ишлаб чиқариш амалиётларини алмашиш бўйича ҳамкорликни кенгайтиришга тайёрлигини билдирди. «Ўзметкомбинат» АЖ раҳбарияти эса ташрифнинг технологик имкониятларни кенгайтириш, газ ишлаб чиқариш жараёнларини модернизация қилиш ва Бекобод кислород ишлаб чиқариш корхонаси фаолиятини янада такомиллаштириш учун муҳим қадам бўлганини таъкидлади.