«Ўзбекнефтгаз» АЖ Хитойнинг ЮҲАН компанияси билан нефть қазиб олишда илғор технологияларни жорий этиш масалаларини муҳокама қилди

Тошкент, Ўзбекистон (UzDaily.uz) — Пекин шаҳрида «Ўзбекнефтгаз» АЖ Бошқарув раиси ҳамда Хитойнинг «ЮХАН» компанияси раҳбарияти ва Хитой нефть университети профессорлари ўртасида ишчи учрашув бўлиб ўтди.

Музокараларда ишламай турган қудуқларни қайта фаоллаштириш, шунингдек паст дебитлиларидан самарали фойдаланишни таъминлайдиган технологик ечимлар, шу жумладан сув ва углеводородларни ажратиш технологиялари, уларни жорий этиш истиқболлари муҳокама қилинди. Ушбу ечимлар мавжуд заҳиралардан самарали фойдаланиш нуқтайи назаридан муҳим аҳамиятга эга экани таъкидланди.

Бошқарув раиси «ЮХАН» компанияси томонидан таклиф этилган технологик ечимлар, уларнинг Жамият шароитида қўлланиш имкониятлари ҳамда бундай лойиҳаларни амалга оширишнинг асосий техник ва иқтисодий параметрлари бўйича батафсил ва тизимли тақдимот зарурлигини билдирди.

Учрашув якунида томонлар соҳада замонавий технологияларни жорий этиш бўйича ўзаро манфаатли ҳамкорликни йўлга қўйиш имкониятларини кенгроқ ўрганишга келишиб олдилар.