Ўзбекистоннинг «Uzum» компанияси 2027 йилда IPO ўтказишни режалаштирмоқда

Тошкент, Ўзбекистон (UzDaily.uz) — Ўзбекистоннинг энг йирик стартапи ва мамлакатдаги илк «юникорн» мақомига эришган Uzum компанияси 2027 йилда ўтказишни режалаштираётган акцияларнинг илк оммавий жойлаштирилиши (IPO) учун Лондонни эҳтимолий майдончалардан бири сифатида кўриб чиқмоқда.

Reuters агентлиги 16 октябрь куни хабар берганидек, финтех ва электрон тижорат йўналишида фаолият юритувчи, Хитойнинг Tencent корпорацияси қўллаб-қувватлаётган Uzum компаниясининг ҳаммуассиси Николай Селезнёв маълум қилишича, Лондон фонд биржаси компаниянинг халқаро капитал бозоридаги дебюти учун кўриб чиқилаётган вариантлар орасида.

Август ойида Uzum Tencent ва АҚШнинг VR Capital фонди иштирокидаги акциявий маблағ жалб этиш раунди доирасида 70 миллион доллар инвестиция олди. Бу компаниянинг баҳосини 1,5 миллиард долларга етказди.

Лондондан ташқари, стартап Нью-Йоркдаги Nasdaq, шунингдек, Абу-Даби ва Гонконг биржаларидаги имкониятларни ҳам ўрганмоқда.

Селезнёвнинг таъкидлашича, жойлаштириш нархи ҳақида ҳозирча гапириш эрта: «Агар биз Лондон фонд биржасида чиқишни танласак, албатта, FTSE 100 индекси доирасида ҳаракатланишни кўзлаймиз».

Унинг қўшимча қилишича, Uzum хорижга чиқишдан олдин ички бозордаги позицияларини мустаҳкамлашга эътибор қаратишни режалаштирган: «Мен жуда тез географик кенгайиш тарафдори эмасман. Биз аввало Ўзбекистонда ўз позициямизни мустаҳкамлаб, ҳамкорларимизга бу тизим нафақат бу ерда, балки мамлакат ташқарисида ҳам самарали ишлай олишини кўрсатмоқчимиз».