Ўзбекистондаги қуёш ва шамол электр станцияларида электр энергияси ишлаб чиқариш 8 миллиард кВт/соатга етди

Тошкент, Ўзбекистон (UzDaily.uz) — 2025 йил 23 сентябрь ҳолатига кўра, Ўзбекистондаги қуёш ва шамол электр станциялари томонидан 2025 йилда ишлаб чиқарилган электр энергияси 8 млрд кВт·соатга етди, деб хабар қилди Энергетика вазирлиги матбуот хизмати.

Бу Президентимиз томонидан 2023 йил 20 сентябрда БМТ Бош Ассамблеясининг 78-сессиясида белгилаб берилган стратегик вазифалар – иқтисодиётни иқлим ўзгаришларига мослаштириш, углерод нейтраллигига эришиш ва «яшил» энергетика улушини кескин ошириш йўлида амалга оширилаётган ишларнинг ёрқин ифодасидир.

Бугунги кунда мамлакатимизда умумий қуввати 4 682 мегаватт бўлган 12 та қуёш фотоэлектр станцияси ва 5 та шамол электр станцияси ишлаб турибди. Қайта тикланувчи энергия манбаларидан фойдаланиш натижасида 2 миллиард 424 миллион куб метр табиий газ тежаб, атмосферага 3 миллион 552 минг тонна зарарли моддалар чиқарилишининг олди олинди.

Яна бир муҳим кўрсаткич, жорий йил бошидан 23 сентябрь соат 17:00 ҳолатигача Ўзбекистондаги барча гидроэлектр, қуёш ва шамол станциялари жами 13 млрд 220 млн кВт·соат электр энергияси ишлаб чиқарди. Бу – мамлакатимиздаги умумий генерациянинг 22 % ини “яшил энергия” ташкил этаётганини англатади.

Бу ҳажм 7,3 миллион хонадонни тўққиз ой ёки 5,5 миллион хонадонни тўлиқ йил давомида электр энергияси билан таъминлаш учун етарли.