Ўзбекистондаги қуёш ва шамол электр станциялари 2026 йилда 1 млрд кВт⋅соат «яшил» энергия ишлаб чиқарди

Тошкент, Ўзбекистон (UzDaily.uz) — 2026 йилда Ўзбекистондаги қуёш ва шамол электр станциялари 1 млрд кВт⋅соат электр энергияси ишлаб чиқарди. Бу ўтган йилнинг шу даврига нисбатан 400 млн кВт⋅соатга, яъни 40 фоизга кўпдир.

Энергетика вазирлиги маълумотларига кўра, 13 февраль куни соат 12:30 ҳолатига йил бошидан бери ишлаб чиқарилган «яшил» электр энергиясининг жами ҳажми 1 млрд кВт⋅соатга етган. Айни пайтда мамлакатда умумий қуввати 5 582 МВт бўлган 15 та қуёш фотоэлектр станцияси ҳамда 5 та шамол электр станцияси фаолият юритмоқда.

Ўзбекистонда қайта тикланувчи энергия манбаларини кенг жорий этиш 2022 йилдан бошланган бўлиб, ўша йилда Навоий ва Самарқанд вилоятларидаги қуёш электр станциялари 434 млн кВт⋅соат энергия ишлаб чиқарган. 2023 йилда бу кўрсаткич 576,9 млн кВт⋅соатга етган, 2024 йилда тўққизта қуёш ва битта шамол станцияси 4,86 млрд кВт⋅соат энергия ишлаб чиқарган, 2025 йилда эса барча қуёш ва шамол электр станциялари жами 10,5 млрд кВт⋅соат электр энергияси ишлаб чиқарган.

2026 йил бошидан буён қуёш электр станциялари 396 млн кВт⋅соат, шамол электр станциялари эса 604 млн кВт⋅соат энергия ишлаб чиқарган. Бу ҳисобига 267 млн куб метр табиий газ тежаб қолинган ҳамда атмосферага 575 минг тоннадан ортиқ зарарли моддалар чиқарилишининг олди олинган.

Гидроэлектр станциялари ишлаб чиқарган энергияни ҳам ҳисобга олганда, йил бошидан 13 февраль кунига қадар жами электр энергияси ишлаб чиқариш ҳажми 1,57 млрд кВт⋅соатни ташкил этди. Бу эса 400 млн куб метр табиий газни тежаш ва атмосферага 863 минг тоннадан ортиқ ифлослантирувчи моддалар чиқарилишининг олдини олиш имконини берди.