Ўзбекистонда совуқ об-ҳаво сабаб метан қуйиш шохобчалари фаолияти яна чекланди

Тошкент, Ўзбекистон (UzDaily.uz) — Ўзбекистонда метан ёқилғисида ишловчи автомобиль газ тўлдириш компрессор станцияларининг фаолиятига яна чекловлар жорий этилди. Бу ҳақда мамлакат Энергетика вазирлиги хабар қилди.

Хусусан, шу куни Тошкент шаҳрида АГТКСлар ёпилди, суюлтирилган газ (пропан) қуйиш шохобчалари эса фаолиятини давом эттирди. Энергетика вазирлигида тушунтирилишича, ҳаво ҳарорати пасайиши ортидан айрим ҳудудларда табиий газга бўлган талаб кескин ошган, бу эса газ қувурларида босимнинг пасайишига олиб келган.

Вазирлик мавжуд вазиятда устувор вазифа аҳолини, тиббиёт ва таълим муассасаларини, шунингдек жамоат транспортини газ билан узлуксиз таъминлаш эканини таъкидлади.

«Бу чоралар фақат совуқ кунларда жорий этилади ва аҳолини барқарор газ таъминоти билан таъминлашга қаратилган. Вазият барқарорлашган сари чекловлар бекор қилинади», — дейилади вазирлик хабарида.

Бу сафар метан қуйиш шохобчаларининг аниқ иш соатлари очиқланмади. Энергетика вазирлиги уларнинг иш режими ҳар бир ҳудуддаги жорий вазиятдан келиб чиққан ҳолда алоҳида белгиланишини қайд этди.