Ўзбекистонда Smart Hospital лойиҳаси илгари сурилмоқда

Тошкент, Ўзбекистон (UzDaily.uz) — Ўзбекистонда соғлиқни сақлаш тизимига илғор технологияларни жорий этишга қаратилган Smart Hospital лойиҳаси амалга оширилмоқда.

Соғлиқни сақлаш вазири ўринбосари Олим Омонов Huawei Tech Investment Tashkent компанияси делегацияси билан ишчи учрашув ўтказди. Делегацияга директор ўринбосарлари Янь Тоюань ва Сули Ғайрат бошчилик қилди.

Музокаралар давомида томонлар лойиҳани амалга ошириш учун пилот ҳудудни танлаш, тиббиёт ходимларини тайёрлаш ва уларнинг малакасини ошириш, шунингдек икки томонлама ҳамкорликнинг ҳуқуқий жиҳатларини муҳокама қилди.

Huawei вакиллари кадрлар тайёрлашнинг уч босқичли тизимини жорий этишни таклиф қилди. У тиббиёт ходимлари, бошқарувчилар ва ахборот-коммуникация технологиялари соҳаси мутахассисларини ўқитишни ўз ичига олади.

Учрашув якунларига кўра, рақамли тиббиётни янада ривожлантириш, илғор технологияларни жорий этиш ва Ўзбекистон ҳамда Huawei компанияси ўртасидаги ҳамкорликни кенгайтириш бўйича келишувга эришилди.