Ўзбекистонда бўлиб ўтадиган эркаклар ўртасидаги FIFA Series 2026 турнири иштирокчилари аниқланди

Тошкент, Ўзбекистон (UzDaily.uz) — 2026 йилнинг март–апрель ойларида Ўзбекистонда ўтказиладиган FIFA Series турнирининг барча иштирокчилари маълум бўлди.

Ўзбекистон футбол ассоциацияси хабарига кўра, мусобақада Ўзбекистон, Габон, Тринидад ва Тобаго ҳамда Венесуэла миллий терма жамоалари иштирок этади.

2025 йил ноябрь ойида ФИФА Ўзбекистонни 2026 йилги эркаклар ўртасидаги FIFA Series™ турнирини қабул қилувчи давлатлардан бири сифатида эълон қилган эди. Мусобақа келаси йилнинг март–апрель ойларидаги халқаро ўйинлар ойнаси доирасида ўтказилиши режалаштирилган.

Ушбу турнир Ўзбекистон миллий терма жамоаси учун турли қитъалар вакиллари бўлган жамоаларга қарши майдонга тушиш, халқаро тажрибани кенгайтириш ҳамда ўз конфедерацияси доирасидаги одатий мусобақалардан ташқарида ўзини синаб кўриш учун ноёб имконият яратади.